Air Force Run nagmalampuson

NAGMALAMPUSON ang gilusad nga Air Force Reservist Fun Run nga nagsugod didto sa Victoria Plaza Mall parking lot ning siyudad niadtong imaging semana.

Ang kalihukan gitawag nga Dagan sa Kahi-usahan ug Tul-id nga dalan diin dunay tulo ka kategorya: 3K, 5K ug 10K diin 500 ka Dabawenyo ang misalmot sa aktibidad.

Gihatagan og premyong kwarta ug medalya ang mga midaug sa matag kategorya sa lalaki ug babaye.

Ang napundo nga kwarta sa kalihukan igahin alang sa ipadayon nga programa nga gihimo sa Air Force sama sa Brigada Eskwela ug Feeding program sa Bangoy ug Gantungan Elementary School, reforestation ug greening program sa Barangay Lamanan sa Malagos, Medical ug Dental mission, Blood letting program ug Coastal clean-up sa Sasa.

Nagpasalamat si Atty. Lenard Cagatin sa ngalan sa Air Force sa mga misuporta sa ilang gihimong lumba dagan.

Ang mga misuporta sa kalihukan mao sila MJ. Jacinto, Abratique & Associations, Anflocor, Davao light, Gakken Phils., Sta Lucia, Tampakan Mining Corp., Atty. Victoriano Bello, Atty. Antonio Llamas, K bro, Samulco, ug Victoria Plaza. (MSR)

Bayot gipatay sa uyab, gilubong

MGA bukog sa bayot nga missing sulod sa pipila ka mga buwan napalgan sa usa ka bakanteng balay sa San Roque St., Barangay Linao-Lipata, Minglanilla, mga alas 4 pasado sa hapon niadtong Biyernes.

Ang biktima gituohang gipatay sa iyang hinigugma, kinsa niangkon sa krimen tungod sa selos.

Ang biktimang si Albert Navarro, 54, usa ka certified public accountant (CPA), lumad nga taga Kamagayan, Barangay Lawaan 1, dakbayan sa Talisay, missing sukad niadtong Mayo 16 ning tuiga.

Si PO3 Benedicto Laski, usa sa mga ningresponde sa hitabo nga nahinabi sa Sun.Star Superbalita, nagkanayon nga ningdangop sa ilang buhatan sa miaging adlaw ang igsuon sa biktima.

Nihangyo kini kanila nga adtuon ang usa ka abandonado nga building tungod sa nikatap nga estorya nga hayan naa sa sulod ang iyang missing nga igsuon.

P5 M gahin sa Christmas party sa City Hall; Mike mipasabot

MOKABAT sa P5 milyones ang gigahin sa Cebu City Government alang sa umaabot nga Christmas Party sa mga opisyal ug mga empleyado sa Cebu City Hall.

Ang Cebu City Council nitugot sa paggasto sa maong kantidad pinaagi sa resolution nga gipanday ni Konsehal Lea Japson ug giaprobahan niadtong Septiyembre 28.

Si Mayor Michael Rama nanalipod sa gidak-on sa maong budget.

“Okay ra man na kay daghan man kaayo tag empleyado. Bahinbahinon pa gud na. It will not cover the food alone but also the giveaways like hams,” pasabot ni Rama.

Siya nipadayag nga ang gahin karong tuiga alang sa Pasko susama ra sa gahin sa miaging tuig ug sa nangaging katuigan.

16-anyos patay sa bangga sa motor

BABAYE namatay kay nabuak ang ulo dihang nabangga sa poste sa kuryente ang motorsiklo nga iyang gisakyan niadtong Biyernes sa alas 11:15 sa buntag sa national highway sa Barangay Tapon, lungsod sa Dumanjug, Sugbo.

Si Calrpine Joy Nimel, 16, nagpuyo sa lugar, dead-on-arrival(DOA) sa Barili District Hospital tungod sa grabing kadaot sa iyang ulo ug kalawasan.

Kritikal ang iyang ig-agaw nga si Kirk Nimel, kinsa maoy nagdala sa motorsiklo human nakaangkon usab sa grabing pangos ug kadaot sa kalawasan.

Si PO2 Rafael Baritua, desk officer sa Dumanjug Police Station nga nahinabi sa Sun.Star Superbalita, nagkanayon nga ang mga biktima gikan sa merkado publiko sa Barangay Poblacion kay dunay gipamalit.

Mga bata sa Fuente nanglabni, namugno

SAMDAN ang duha ka mga dalaga nga gitabangan pagbugno sa labing minos 10 ka mga batang libod suroy nga ningtulis kanila sa General Maxilom Ave., dakbayan sa Sugbo kagahapon sa alas 5 sa buntag.

Taxi nga maoy gisakyan sa mga biktima aron pag-ikyas gitabangan pagpukpok ug gitapuk-an sa mga bata aron di makadagan ug gihapsan pa og bato ang windshield.

Ang nagpa blotter sa Fuente police station ug nakaangkon og mga garas sa ilang mga nawong ug kalawasan mao sila si Yancy Limbaga, 24, ug iyang igsuon nga si Wrinkler, 21, taga Barangay Buhisan ning dakbayan.

Nakuha unta gikan kanila ang pitaka nga may sulod nga kapin sa P3,000, apan ila ra sab nga nabawi gikan sa mga bata.

Sa pasiuna nga imbestigasyon nga gihimo ni SPO1 Agustin Collano sa Fuente Police nagbutyag nga gikan ningsuroy ang mga biktima uban sa ilang higala nga Koryano.

Bella gibantayan

DUNAY nagmonitor sa mga lihok ni Bella Ruby Santos samtang nagtingkagol sud sa bilangguan sa dakbayan sa Naga.

Mao kini ang gipaneguro ni Renante Pique, amahan sa biktima nga si Ellah Joy Pique kinsa gidagit ug gipatay sa lungsod sa Minglanilla niadtong Pebrero 8, 2011 gikan sa iyang tunghaan sa Calajoan Elementary School ug padulong na mopauli sa ilang balay.

Si Pique nipadayag nga maong nagpatagad ang mga kabanay ni Bella Ruby pinaagi sa pagkumbira ug pagpakaon sa kaubang mga piniriso aron mo-request ang ilang habig nga ibalhin siya sa Cebu Provincial Detention and Rehabilitation Center sa Barangay Kalunasan siyudad sa Sugbo.

Matod niya dunay nitug-an niya nga nagmahay si Santos nga diha sa Naga City Jail nagpabalhog gumikan kay huot ang selda ug limitado lang ang iyang paglihok.

Mag-uuma gitigbas patay sa iyang silingan sa North Cotabato

CARMEN, North Cotabato - Usa ka mag-uuma ang gipatay sa iyang silingan sa alas-2:00 sa kadlawon niadtong Martes didto sa probinsiya sa Cotabato.

Nailhan ang biktima nga mao si Elizer Magaso, 53-anyos, minyo og moluyo sa Sitio Kilabao, Barangay Kimadzil, Carmen.

Gibutyag ni Carmen C/Insp. Jordine Maribojo nga samtang natulog ang biktima sa kubo-kubo sa iyang uma kalit kining gisulod sa iyang silingan nga naila nga si Ireneo Urboda, 67; biyudo og nagpuyo sab sa naasoy nga dapit.

Nagkalalis pa ang duruha sa problima sa ilang yuta nga gi-ugmad pagkataud-taud mihulbot sa iyang dala nga sundang ang suspek og gitigbas sa makadaghan nga higayon ang biktima.

Patay gilayon si Magaso nga nakahiagom og samad tinigbasan sa iyang nawong ug liog samtang ang suspek ang dali nga misibat paingon sa wala matino nga dapit.

Negosyante, gitipi sa Maguindanao

DATU ODIN SINSUAT, Maguindanao - Patay ang usa ka negusiyante human siya gipusil sa alas-4:10 sa hapon niadtong Martes didto sa probinsiya sa Maguindanao.

Nailhan sa kapulisan ang biktima nga mao si Datucan Midtimbang, 41-anyos, buy and sell trader og molupyo sa Tenerio, Datu Odin Sinsuat.

Sa nahagpat nga taho gikan sa Maguindanao Police Provincial Office (MPPO) nga samtang naglakaw ang biktima pagawas sa iyang bay paingon sa siyudad sa Cotabato sa diha nga giatngan siya sa duha ka wala mailhing tawo og gipusil gamit ang kalibre. 45 nga pistola.

Patay gilayon si Midtimbang sa diha nga naigo sa iyang ulo ug dughan samtang ang mga suspetsado ang dali nga misibat sakay sa usa ka motorsiklo nga walay plaka paingon sa wala matino nga direksyon.

Gibutyag ni Datu Odin Sinsuat Chief of Police, chief inspector Lindsay Sinsuat nga walay nakaila sa mga sibilyan ngadto sa duha  tawo nga mipusil patay sa biktima gumikan pulos sila naka-helmet.