Bayot gipatay sa uyab, gilubong

MGA bukog sa bayot nga missing sulod sa pipila ka mga buwan napalgan sa usa ka bakanteng balay sa San Roque St., Barangay Linao-Lipata, Minglanilla, mga alas 4 pasado sa hapon niadtong Biyernes.

Ang biktima gituohang gipatay sa iyang hinigugma, kinsa niangkon sa krimen tungod sa selos.

Ang biktimang si Albert Navarro, 54, usa ka certified public accountant (CPA), lumad nga taga Kamagayan, Barangay Lawaan 1, dakbayan sa Talisay, missing sukad niadtong Mayo 16 ning tuiga.

Si PO3 Benedicto Laski, usa sa mga ningresponde sa hitabo nga nahinabi sa Sun.Star Superbalita, nagkanayon nga ningdangop sa ilang buhatan sa miaging adlaw ang igsuon sa biktima.

Nihangyo kini kanila nga adtuon ang usa ka abandonado nga building tungod sa nikatap nga estorya nga hayan naa sa sulod ang iyang missing nga igsuon.

Dali kini nilang giadto ug nakita sa kapulisan ang usa ka humok ug bugdo nga yuta ilawom sa hagdanan sa balay.

Nitumaw ang ilang pagduda nga adunay gilubong niini.

Dugang pa ni Laski nga dali dayon nilang gipahibawo ang ilang hepe, kinsa mimando nga kubkubon ang yuta.

“Pagkakita namo sa bugdo ug humok nga yuta, amo dayon gitawgan si chief bahin sa among nakita, kay nagduda man jud mi nga naay gilubong nga tawo,” pasabot sa pulis.

Wa masayop ang ilang pagduda, hilabihan nilang kurata sa pagkakita sa baho nga kalabera sa tawo nga duna pay pipila ka mga bahin sa unod nga nagtapot niini.

Gikompirmar sa igsuon sa biktima nga si Galen Navarro nga sa iyang maguwang ang lawas base sa nakit-an niya nga usa ka kwentas nga kanunay sul-ubon niini.

Usa ka Richard Mandal, 34, traysikol drayber, lumolupyo sa P. Del Bas St., Lower Mohon, dakbayan sa Talisay ang gitumbok nga responsable sa pagka missing sa biktima.

Nasayran sa kapolisan nga ang abandonadong building maoy gipuy-an kaniadto ni Mandal.

Ang suspek giingong uyab sa biktima.

Giingong nilayas kini sa dihang gikomprontase ni Galen bahin sa pagka missing sa iyang igsuon.

Nadakpan ang suspek sa ilang balay sa Mohon mga pipila ka oras human nakubkoban ang lawas sa biktima.

Si Mandal niangkon nga siya mismo ang mipatay sa biktima pinaagi sa pagbunalbunal sa ulo niini sa makadaghang mga higayon ginamit ang usa ka kahoy.

Dali niyang gilubong sa lungag nga dunay gilawmon nga tulo ka mga tiil ang biktima.

Gibutyag usab sa kapulisan nga si Mandal nipasabot nga iyang napatay ang biktima tungod sa selos.

Gitanggong karon sa Talisay police station ang suspek ug gikatakdang pasakaan og kasong murder ugmang adlawa.