Konduktor gipatay sa pasahero

ESPERANZA, Sultan Kudarat -- Gipusil patay sa wa mailhing lalaki ang usa ka konduktor sa dyip human alas 7:00 sa gabii niadtong Sabado didto sa probinsiya sa Sultan Kudarat.

Nailhan sa kapulisan ang biktima nga mao si Efren Tumbalon, 43, minyo ug molupyo sa Barangay Calawag Dos, Isulan.

Base sa report Sultan Kudarat Police Provincial Office (SKPPO), nahitabo ang pagpamusil samtang nagtindog ang biktima duol sa merkado publiko sa Barangay Poblacion, Esperanza.

Nasayran nga naghulat og pasahero ang iyang gikonduktoran nga dyip apan giduol siya sa mamumuno dayon gipusil gamit ang kalit .45 nga pistola.

Namatay dayon ang biktimang si Tumbalon human naigo iyang ulo ug dughan, samtang ang suspetsado ang daling misibat sakay sa naghuwat nga motorsiklo paingon sa probinsiya sa Maguindanao.

Walay nakaila sa mamumuno gumikan kay nagsul-ob og jacket ug helmet mao nga di maklaro ang iyang hitsura.

Matud ni Narciso Agis, drayber sa dyip ug paryente sa biktima, nga sa wa pa gipatay ang iyang konduktor, dunay naka-away nga mga pasahero sanglit kulang ang ilang pamilete gikan sa Tacurong City paingon sa Esperanza.

Sa kasamtangan, padayon pa ang imbestigasyon sa kapulisan aron masayran ang motibo, mailhan ug masikop ang mga mamumuno.

Duterte wa misuporta sa NPA

GILIMOD ni Davao City Vice Mayor Rodrigo Duterte ang intelligence report nga misuporta siya ug iyang anak sa New People's Army (NPA).

Si Duterte namahayag niini human gipaguwa ang report sa Armed Forces of the Philippines (AFP) nga gisuportahan sa mga Duterte ang NPA.

Base sa report, gihataga'g kuwarta ug armas sa bise mayor si Leoncio Pitao, alyas Kumander Parago.

Gibutyag sab sa report nga ang bise mayor maoy nagbayad sa ospital human nasamdan si Parago sa pinusilay tali sa militar di pa lamang dugay.

"Naa man guy mga report sa una nga naghatag daw ko .45 kay Parago. Sa tinuod lang, dili ko mohatag og .45 kay Parago sa daghang tao. Kung mohatag ko, nganong moadto paman kog bukid nga daghan man og mga sparrow diri, eh di ipasa nalang nila didto," ni Duterte.

Gilimod sab ni Duterte ang isyu nga nangampanya ang iyang anak nga si Mayor Sara Duterte sa mga rebelde dihang midagan siya isip mayor sa siyudad.

Giklaro sa bise mayor nga ang lokal nga gobyerno wa nakigsabot sa mga rebelde sukwahi sa miguwang intelligence report. (Jereco O. Paloma)

Lalaki nalumos sa dagat

USA ka patay nga lawas ang nakaplagan nga naglutaw sa dagat sa Pag-ibig Village, Barangay Dumoy, siyudad sa Davao, niadtong Sabado.

Ang biktima mao si Loreto Bancal, hamtong ang panuigon, walay trabaho ug nagpuyo sa Barangay Lipadas, distrito sa Toril.

Sa inisyal nga imbestigasyon ni PO3 Delima sa Talomo Police Station, ang biktima nadiskubrehan sa mga residente sa maong lugar.

Daling gidala ang biktima sa Acosta Medical Hospital sa Toril, apan gideklara siyang patay sa mga doktor.

Ang patay nga lawas sa biktima gidala sa Villa Punerarya.

Nagtuo ang kapulisan nga nalumos ang biktima tungod kay way nakitang samad sa iyang lawas dihang giotopsiya sa mga otoridad. (Blue Cordero)

Construction worker gipatay

PATAY ang usa ka construction worker human siya gidunggab didto sa Morning Side Heights, Bajada, syudad sa Davao.

Ang insidente nahitabo ala 1:15 sa kaadlawon kagahapon nga miresulta sa kamatayon ni Lemar Agalo, 22, stay-in sa gitrabahoan niyang Camella Homes Site sa dalang Bajada.

Sa spot report ni SPO2 Leo Dayuno sa San Pedro Police Station, nasayran nga naglakaw ang biktima sa dalang Bajada, apan giduol siya sa suspek.

Matud ni Dayuno nga nagpakaaron-ingon ang suspek nga mangayo og tabang sa biktima kay nasamdan ang iyang asawa.

Miuban sab dayon ang biktima sa suspetsado ug pag-abot nila sa ngit-ngit nga lugar, kalit lang gidunggab ang dughan sa biktima.

Human ang panghitabo, daling misibat ang suspek dagan sa wala matinong direksyon.

Mga sakop sa Scene of the Crime Operations nagbutyag nga dead on the spot ang biktima tungod kay grabe ang samad nga iyang naangkon sa dughan.

Ang patay nga lawas sa biktima atua karon gihaya sa Angel Funeral Homes.

Sa pagsuwat ning balita, padayong giimbestigahan ang insidente sa kapulisan sa San Pedro. (Blue Cordero)

Gwardiya nakapusil sa anak, gidemanda

GIPASAKA na sa kapulisan ang kasong Illegal Discharge of Firearms batok sa security guard nga nakapusil sa iyang anak niadtong Oktubre 8.

Gidemanda mao si Raymart Pamolino, 27, security guard sa Ropisa Security Agency, nagpuyo sa Lao Street, Barangay Toril Proper.

Ang kaso gipasaka sa kapulisan tungod sa paglapas sa Illegal Discharge of Firearms ilawom sa Article 254 sa Revised Penal Code.

Nakadoket ang kaso sa IS# XI-02-INV-11-J-02910 pinaagi sa regular filing procedure sa City Prosecutor’s Office.

Si Pamolino maoy nakaingon sa pagkasamad sa iyang anak alas 4:00 sa hapon samtang nagduwa kauban iyang ig-agaw.

Miabot ang akusado kinsa hubog niadtong higayona, dayon iyang giduol ang iyang pag-umangkon sanglit wa giuli sa uwahi ang iyang bisikleta.

Gikuha ni Palomino ang iyang .38 kalibre nga rebolber dayon gipabuto sa yuta apan naigo na hinuon ang iyang anak sa braso. (Blue Cordero)

Fetus gilabay sa kasilyas

SOUTH COTABATO -- Usa ka fetus ang nakaplagan sulod sa comfort room sa sementeryo sa alas 2:30 sa hapon niadtong Sabado didto sa probinsiya sa South Cotabato.

Ang spot report sa Sto. Nino Police Station nagpahibalo nga nga nakadawat sila og tawag nga dunay nakaplagan nga fetus sa Divine Heritage Memorial Park.

Suma ni Allan Torrejos Dandiego, empleyado sa DHMP, nga ang fetus iyang nakit-an sulod sa toilet bowl dihang mangihi unta siya.

Gidugang ni Dandiego nga dili nila matino kon kinsa ang tag-iya sa fetus gumikan kay daghang tawo ang nagagamit sa ilang CR.

Dako ang pagtuo sa otoridad nga posibleng didto gilaglag sa inahan ang naasoy nga fetus sa comfort room gumikan sa personal niya nga problema.

Matud sa opisyal sa Sto. Nino Municipal Health Office nga anaa na sa unom hangtud pito ka bulan ang fetus.

Gilubong sab dayon ang fetus sa mga personahe sa Municipal Social Welfare and Development Office, Local Civil Registrar ug Municipal Health Office. (Edgardo Fuerzas)

Crane sa SM nabawug

CENTRAL MINDANAO -- Laing kontrobersiya na sab ang gikalambigitan sa gitukod nga SM mall sa General Santos City.

Ang kontrobersiya miguwa human gitaho nga nabawug ang crane sa contractor sa maong mall nga Monolith Construction Company.

Sa imbestigasyon sa kapulisan, nabawug ang crane tungod sa kabug-at sa karga nga puthaw gikan sa silong nga bahin padung sa ibabaw sa building.

Hinuon, gibutyag nga walay naangol sa nahitabong pagkabawug sa crane alas 3:00 sa hapon niadtong Sabado.

Una niini, miani og pagsaway gikan sa katawhan ug mga enhinyero sa siyudad ang maong mall human nahugno ang car park area sa 4th floor.

Ang insidente miresulta sa pagkaangol sa upat ka mga tawo.

Ang consultant sa SM for Mindanao Project nagbutyag nga ila nang gihimo ang tanan alang sa seguridad sa mga trabahante.

Giingon nga ang tanan nga galastusan sa upat ka tawo nga naangol gitubag na sa tagdumala sa SM. (Edgardo Fuerzas)

Global Handwashing Day gihimo sa Buhangin Gym

MALAMPUSONG gisaulog niadtong Sabado ang Global Handwashing Day didto sa Buhangin Gym, Barangay Buhangin, siyudad sa Davao.

Ang tema sa kalihukan mao ang "Clean Hands Save Lives" ug "Pamilya Playtime Para sa Kalusugan" nga ika-upat na ka tuig nga gisaulog dinhi sa nasud sukad niadtong 2008.

Ang aktibidad gisuportahan sa Proctor and Gamble (P&G), Unicef, Department of Education (DepEd) ug Department of Health (DOH) nga nagpaabot og mensahe nga paghatag og importansya nga manghugas og kamot ang mga Pilipino.

Tumong niini mao nga magpabilin nga himsog ang mga bata ug malikay sa sakit sama sa diarrhea ug Pneumonia.

Base sa talaan sa DOH, ang maong sakit mitala na og 3.5 milyon ka mga bata matag tuig ang nagkasakit dinhi sa Pilipinas.

4 anyos nalumos sa sapa

DAVAO DEL SUR -- Usa ka 4 anyos nga lalaki ang nakaplagan nga wa nay kinabuhi human gituhuang nalumos sa sapa didto sa Barangay Towak, lungsod sa Matanao, niadtong Sabado.

Ang biktiam giila sa kapulisan nga mao si Jame Paul Lasib, molupyo sa Barangay Dongan Pekong, sa maong lungsod.

Ang bata nakit-an nga naglutaw sa sapa alas 11:00 sa buntag pinaagi ni Bebing Sarol, 27, molupyo sa Mal Valley, Barangay Towak.

Matud ni Sarol ngadto sa kapulisan nga nanglaba siya sa sapa sa dihang nakit-an niya ang bata nga wa nay kinabuhi.

Paghiling sa mga otoridad, nasuta nga adunay samad ang ulo sa bata.

Giotopsiya na sa kapulisan ang patay'ng lawas sa bata aron sutaon kung dunay “foul play” sa iyang kamatayon.(Orlando Dinoy)

Digos City Central Market: Mahal nga arkela gireklamo

DIGOS CITY -- Gireklamo sa pipila ka mga negusiyante sanglit mahal kaayo ang arkila sa bag-ong nahuman nga two-storey building sa Digos City Central Market.

Ang merkado publiko dunay 517 ka mga stalls, wa pay labot niini ang dakong hawan nga gitagana sa mga sidewalk.

Unang mireklamo mao si Delia Ruta, chairperson sa fish vendors cooperative.

"Ang problema lang namo kay mahal gyud ang arkila," pahayag ni Ruta sa SuperBalita.

Mireklamo ang uban kay dunay unom ka buwang guarantee deposit mao nga kinahanglan nilang mobayad og P10 mil aron makabalhin siya sa bag-ong pwesto.

Giklaro ni Bernardo Quipit Jr., hepe sa Office of the City Economic Enterprise Management, nga prayoridad nila ang mga karaang aplikante kaysa bag-ong negusyante.

Matud ni Quipit nga giagi nila og public hearing ang bag-ong rate sa arkila ug giaprubahan kini sa kadaghanan.

"Kanang guarantee deposit makuha man na nila inig hawa nila unya nasabotan na man ang bag-ong rental rate," ni Quipit.

Si Mayor Joseph Penas miangkon nga istrikto ang ilang pagpatuman sa balaud sa merkado sanglit di na sila gusto nga adunay malupigan.

Gibutyag sa mayor nga ila kining gihimo tungod sanglit ilang nadiskubrehan nga dunay nakakuha og baratong pwesto apan gipa-arkelahan og mahal ngadto sa laing negusiyante kaniadto.

Sa kasamtangan, han-ay na karon ang vegetable, meat ug fish section sa silong nga bahin sa merkado samtang sa ikaduhang andana makita ang tailoring, salon, barbershop ug uban pang tindahan. (Orlando Dinoy)

Katawhan giserbisyuhan sa pulis ug militar

DAVAO DEL NORTE -- Usa ka community health and social service outreach program ang hiniusang gilusad sa Davao del Norte Provincial Police Office (DNPPO) ug 1003rd Infantry Brigade sa Philippine Army didto sa lungsod sa San Isidro.

Ang kapulisan ug militar maoy mitunol sa ilang serbisyo pinaagi sa libreng medical check-up, ibot ngipon, tambal, simelya sa gulay, abono sa utanon, ug bitamina sa mga hayop niadtong miaging adlaw.

Ang kapulisan gipangulohan ni DNPPO assistant provincial director Jessie Estrada, samtang ang 1003rd IB gipangulohan ni commanding officer Colonel Lyzander Suerte.

Sa maong programa, na-check-up nila ang 350 ka residente; 141 ang naibtan og ngipon; 353 nahatagan og libreng tambal; 209 nakadawat og semilya sa gulay; 444 sa abono sa utanon; samtang 180 ka binuhing hayop ang natabangan sa beterinaryo.

Flyover hapit na sugdan: Mayor Silvosa

PANABO CITY -- Sa dili madugay, paggatukuron na sa Department of Public Works and Highways (DPWH) ang 400 milyones pesos nga flyover aron masulbad ang problema nga nagkahuot nga dagan sa trapiko sa siyudad sa Panabo.

Kini ang pahayag ni Panabo City Mayor Jose Silvosa sa pakighinabi kaniya sa SuperBalita.

Suma ni Silvosa nga nalipay ang katawhan sa umaabot nga proyekto didto sa Pan-Philippines Highway-Tadeco Road Intersection.

Dugang ni Silvosa nga ang maong flyover sama kini sa flyover sa Agdao Public Market.

Gipasabot sa mayor nga haum alang sa maong dapit ang proyekto sanglit alas 5 hangtud alas 7 sa gabii maghuot na ang dagan sa trapiko.

Sa maong proyekto, daghan ang wala mopabor kay maapektuhan ang ilang negusiyo, apan suma ni Silvosa nga kinahanglang masabtan nila nga makaayo ang maong proyekto.

Matud niya nga di ibutang ang proyekto kung makadaut kini sa publiko.

Gisulti ni Silvosa nga ilang paminawon ang mulo sa katawhan pinaagi sa public consultation aron masayran kung kinsa ang maapektuhan o makabenepisyo sa proyekto. (Teddy Cabana)

Shalani gibalayan na ni Rep. Romulo

BISAN sunod tuig pa ang ilang kasal, duna naghulat nga bonggang balay alang ila Pasig Representative Roman Romulo ug celebrity politician nga si Shalani Soledad.

Matud pa mipalit na og balay si Romulo sa Pasig diin puy-an kauban ang soon-to-be wife human sa umaabot nilang kasal.

Apan plano gihapon ni Romulo nga mopalit og laing balay sa Valenzuela City alang kang Shalani.

Samtang giklaro ni Romulo nga di niya paundangon ang konsehala sa mga showbiz commitments niini sa oras nga makasal na sila.

Kini tungod nga una pa sila nagkaila ni Shalani misulod na kini sa showbiz isip game show host.

Nasuta sab nga abli sa Valenzuela councilor nga imbitahon sa ilang kasal ang pamilyang Aquino.

Matud ni Shalani, doul sa pamilya sa iyang fiancee ang pamilya sa ex-boyfriend niini si Pangulong Noynoy Aquino hinungdan posible nga imbitahon nila kini sa ilang kasal.

Leandro gibasted

CHIKA karon nga gibasted na ni Nadine Samonte si Leandro Munoz. Kini human murag na wala lang og pinakalit ang sweetness sa duha.

"Ay!" Nagkatawa na lang ang aktres dihang gipangutana ngadto sa iya ang maong isyu. "Ayokong magsalita. Leave it as a question mark na lang muna. Ha-ha-ha!"

Say pa gibasted niya si Leandro tungod mas type gihapon niya ang ex-boyfriend niyang si Emerson diin hangtud karon nagpabilin gihapon ang ilang komunikasyon.

"Hindi. Hindi pa. Nagti-text-text siya. Hindi naman nga nawala 'yong pagti-text niya sa akin ever since, e." pahayag ni Nadine.

Giklaro sab sa aktres nga maayo ang ilang relasyon ni Leandro ug kun ugaling di maging sila, magpabilin gihapon ang ilang friendship.

"Uhm we're friends. We're friends," dugang sa aktres.

Sharon di na mobalhin sa TV5

SAMTANG anaa si Sharon Cuneta sa abroad, migawas ang chika nga duna kini plano mobalhin sa TV5.

Apan sa dihang nahibal-an ni Megastar ang maong isyu, dali kini niya gitubag diin wa kini kamatuoran.

Duna sab miingon nga desidido gyud si Sharon nga mohawa sa ABS-CBN tungod nahibal-an niya nga mas ubos ang iyang talent fee niya compared sa ubang artista sa Dos.

Knowing Megastar, nga di niya ginasukod sa kwarta lang ang friendship nila Mr. Gabby Lopez ug Ms. Charo Santos.

May tsika sab nga sa dihang nahibal-an ni Sharon nga wa mag-rate ang teleserye ni Ms. Nora Aunor sa TV5, dali nga nagbag-o ang huna-huna sa aktres ug magpabilin na lang sa Kapamilya Network.

Bonggacious ang TF, apan way motan-aw sa show, natural! didto na lang sa ginatan-aw sa publiko, diba?

Bea Alonzo, mas type mahimong Kapuso?!

GRABE ka uso karon ang pag-ober da bakod sa mga sikat nga artista sa ubang TV stations dihang kumpirmado matud pa nga mobalhin na sa GMA-7 ang sikat nga young star nga si Bea Alonzo.

After sa primetime soap niini sa Kapamilya Network nga Guns and Roses with Robin Padilla, wa pay sunod niini nga proyekto sa maong TV network.

Tsika pa, di tinuod ang tsismis nga sa TV5 mobalhin si Bea, tungod sa GMA-7 kini nakipag-negotiate ang kampo ni Bea para sa posibleng trabahong nga himoun sa Kapuso Network.

Dugang pa niini, wa na mipirma og bag-ong kontrata si Bea sa Dos, hinungdan perti ka libre niini mobalhin sa laing TV network.

Rason matud pa ni Bea nga sulayan mag-trabaho sa uban istasyon ug ang mahimong Kapuso talent daw ang napili niya.

Maricel mitingog na

HUMAN sa pipila ka bulan, mitingog na si Maricel Soriano sa isyung pangmaltrato niya sa iyang kanhi 2 ka maid.

Gipahayag ni Maricel nga di tinuod ang gipahayag sa iyang kanhi katabang nga sila May Cachuela ug Camille Acojeda nga iyang gipasakitan ug gihadlok nga pusilon.

Kahinumduman, nagpasaka na og kasong physical injuries ug grave threats ang duha kontra sa ilang kanhi among aktres.

"I did not commit any act that would constitute the crimes of grave threats, unjust vexation, slander, oral defamation and physical injuries," ni Maricel.

Di sab tinuod nga gikandado niya ang kwarto sa mga kanhi katabang tungod wala gayuy lock ang pultuhan sa maong kwarto.

"Allegation that I attempted to reach my gun is utterly false considering that I did not keep any gun in my house," dugang sa aktres.

Sumala ni Maricel, extortion ang gihimo ang duruha batok kaniya.

"This complaint is clearly a form of harassment and an attempt to extort money from me," ni Maricel.

Bisan wa miadto sa pagdungog sa Makati Prosecutor's Office ang aktres niadtong milabay semana, naglaum gihapon ang 2 ka katabang nga makakuha sila og hustisya sa nahitabong pag-abuso matud pa ngadto kanila.

Yasmien: Bahala na

WAY kasiguraduhan ang tubag sa aktres nga si Yasmien Kurdi sa mga tubag kun andam kini makatrabaho si Baron Geisler.

Kini human nga nagkauli na ang duruha dihang nag-public apology ang aktor kambyo sa pag-atras ni Yasmien sa gipasakang kaso nga acts of lasciviousness batok kang Baron.

Matud ni Yasmien, "bahala na" kun ugaling duna offers sa trabaho nga mag-uban sila.

Sa bahin sab Baron, kung mosugot si Yasmien, willing sab siya niini.

Gi-angkon sa duruha nga gamay lang ang industriya sa showbuz hinugdan dakong posibilidad nga mag-uban sila sa usa ka proyekto. Tama!