BABAYE namatay kay nabuak ang ulo dihang nabangga sa poste sa kuryente ang motorsiklo nga iyang gisakyan niadtong Biyernes sa alas 11:15 sa buntag sa national highway sa Barangay Tapon, lungsod sa Dumanjug, Sugbo.
Si Calrpine Joy Nimel, 16, nagpuyo sa lugar, dead-on-arrival(DOA) sa Barili District Hospital tungod sa grabing kadaot sa iyang ulo ug kalawasan.
Kritikal ang iyang ig-agaw nga si Kirk Nimel, kinsa maoy nagdala sa motorsiklo human nakaangkon usab sa grabing pangos ug kadaot sa kalawasan.
Si PO2 Rafael Baritua, desk officer sa Dumanjug Police Station nga nahinabi sa Sun.Star Superbalita, nagkanayon nga ang mga biktima gikan sa merkado publiko sa Barangay Poblacion kay dunay gipamalit.
Apan sa ilang pag-abot sa kurbadang lugar duol sa Ilaya Bridge, si Kirk nawad-an sa control sa manobela sa motorsiklo hinungdan nga didto sila misampak sa poste sa kuryente nga kongkreto.
Ang mga biktima gidali sa pagtabang sa mga residente sa lugar, apan si Calrpine Joy gideklarar nga DOA.
Si Kirk gibalhin sa tambalanan dinhi sa dakbayan sa Sugbo tungod sa grabi usab nga kadaot sa lawas.
No comments:
Post a Comment