Mga bata sa Fuente nanglabni, namugno

SAMDAN ang duha ka mga dalaga nga gitabangan pagbugno sa labing minos 10 ka mga batang libod suroy nga ningtulis kanila sa General Maxilom Ave., dakbayan sa Sugbo kagahapon sa alas 5 sa buntag.

Taxi nga maoy gisakyan sa mga biktima aron pag-ikyas gitabangan pagpukpok ug gitapuk-an sa mga bata aron di makadagan ug gihapsan pa og bato ang windshield.

Ang nagpa blotter sa Fuente police station ug nakaangkon og mga garas sa ilang mga nawong ug kalawasan mao sila si Yancy Limbaga, 24, ug iyang igsuon nga si Wrinkler, 21, taga Barangay Buhisan ning dakbayan.

Nakuha unta gikan kanila ang pitaka nga may sulod nga kapin sa P3,000, apan ila ra sab nga nabawi gikan sa mga bata.

Sa pasiuna nga imbestigasyon nga gihimo ni SPO1 Agustin Collano sa Fuente Police nagbutyag nga gikan ningsuroy ang mga biktima uban sa ilang higala nga Koryano.

Apan samtang sila naglakaw daplin sa dalan, kalit lang ningduol kanila ang kapin sa 10 ka mga bata.

Ang mga bata nga mga babaye adunay kauban nga bayot nga gi-banabana nga kapin sa 10 anyos usab ang pangidaron.

Ning-alirong kini kanila ug nag-iyahay sa pagkapkap sa mga bulsa sa duha ka mga dalaga ug sa Koryano.

Nakuha ang pitaka ni Yancy, samtang ang pitaka sa kauban nilang Koryano wa madala human maguniti sa langyaw ang iyang bulsa.

Human makakuha sa pitaka, naglumba og panagan ang mga bata palayo.

Apan si Yancy nigukod sa mga bata hangtod nga nakasakay sila og Christoff taxi nga gimaniho ni Mario Servantes uban sa iyang igsuon ug sa Koryano.

Naapsan nila ang mga bata duol sa eskina Juana Osmeña ug General Maxilom.

Gikanaug ni Yancy ug gikomprontase ang mga bata ug gikuha ang iyang pitaka gikan sa usa sa mga bata.
Apan nakakita ang mga kaubang bata ug didto gitabangan pagbugno si Yancy uban sa iyang igsuon nga babaye.

Bisan pa man kon nasamdan na ang mga dalaga, nakahimo pa kini pagsakay sa taxi ni Servantes aron mosibat.

“Wa dayon ko kadagan, Sir. Ang mga tiil sa mga bata ilang gituyo og bangil sa akong ligid aron dili ko kadagan. Gilamok nila ang akong taxi. Lain ang nanguha og bato. Gibato ang sakyanan ug gihapsan ang bildo” matud pa ni Servantes.

Ang mga tawo sa dapit ningtabang, ilang gibunlot ang mga bata nga ningbangil sa ilang mga tiil, una pa nakadagan ang taxi paingon sa Fuente Police.

Gilusad sa kapolisan ang hot pursuit ug didto nagunitan ang walo ka mga bata, lakip na ang usa ka bata nga 7-anyos ug gidala sa presento.

Didto positibo nga giila sa mga biktima nga maoy ningbugno kanila.

Dugang nasayran gikan kang Collano nga ang mga dalaga maoy ikatulo nga mga biktima sa maong gabii sa samang grupo sa mga bata.

Ang unang ning-report mao si Lee Hee Jun, 26, usa ka Korean national, kinsa nakuhaan sa iyang pitaka.

Nahitabo kini pasado alas 2 sa kadlawon kagahapon.