DUNAY nagmonitor sa mga lihok ni Bella Ruby Santos samtang nagtingkagol sud sa bilangguan sa dakbayan sa Naga.
Mao kini ang gipaneguro ni Renante Pique, amahan sa biktima nga si Ellah Joy Pique kinsa gidagit ug gipatay sa lungsod sa Minglanilla niadtong Pebrero 8, 2011 gikan sa iyang tunghaan sa Calajoan Elementary School ug padulong na mopauli sa ilang balay.
Si Pique nipadayag nga maong nagpatagad ang mga kabanay ni Bella Ruby pinaagi sa pagkumbira ug pagpakaon sa kaubang mga piniriso aron mo-request ang ilang habig nga ibalhin siya sa Cebu Provincial Detention and Rehabilitation Center sa Barangay Kalunasan siyudad sa Sugbo.
Matod niya dunay nitug-an niya nga nagmahay si Santos nga diha sa Naga City Jail nagpabalhog gumikan kay huot ang selda ug limitado lang ang iyang paglihok.
Si Pique sa pakighinabi sa Sun.Star Superbalita niingon nga dunay nagsulti niya nga gusto ni Bella Ruby nga mobalhin sa CPDRC sanglit hamugaway ug dili maghuot ang mga piniriso.
Iyang gidugang nga dili nila supakon sa Children’s Legal Bureau kon diha man sa Naga City Jail gipriso ang akusado para makatilaw kini kon unsa kalisod ang mabilanggo sud sa usa ka prisohan.
Hangyo niya sa tagdumala sa maong bilangguan nga itratar si Bella Ruby sama sa ordinaryo nga mga piniriso ug dili hatagan og special treatment.
No comments:
Post a Comment