Mag-uuma gitigbas patay sa iyang silingan sa North Cotabato

CARMEN, North Cotabato - Usa ka mag-uuma ang gipatay sa iyang silingan sa alas-2:00 sa kadlawon niadtong Martes didto sa probinsiya sa Cotabato.

Nailhan ang biktima nga mao si Elizer Magaso, 53-anyos, minyo og moluyo sa Sitio Kilabao, Barangay Kimadzil, Carmen.

Gibutyag ni Carmen C/Insp. Jordine Maribojo nga samtang natulog ang biktima sa kubo-kubo sa iyang uma kalit kining gisulod sa iyang silingan nga naila nga si Ireneo Urboda, 67; biyudo og nagpuyo sab sa naasoy nga dapit.

Nagkalalis pa ang duruha sa problima sa ilang yuta nga gi-ugmad pagkataud-taud mihulbot sa iyang dala nga sundang ang suspek og gitigbas sa makadaghan nga higayon ang biktima.

Patay gilayon si Magaso nga nakahiagom og samad tinigbasan sa iyang nawong ug liog samtang ang suspek ang dali nga misibat paingon sa wala matino nga dapit.

Dali sab nga milihok ang mga pulis ug mga Barangay tanod hinungdan nga nadakpan dayon si Urboda nga mitago sa bay sa iyang paryente.

Dako ang pagtuo ni Carmen Mayor Roger Talinio nga personal nga atraso o away sa yuta ang motibo sa pagpatay sa biktima.

Ang suspek ang gibalhog na sa selda sa kapulisan sa Carmen samtang gisang-at na ang tukmang kaso batok kang Urboda. (Bombo Garry Fuerzas)