Tulo ka customer sa video k bar samdan human gipusil sa guwardiya

GENERAL SANTOS CITY-Tulo ka tawo ang nadala sa ospital human sa natigayung pagpamusil sulod sa usa ka video k bar sa Polomolok, South Cotabato.

Sumala pa ni SPO2 Jerry Sales, imbestigador sa Polomolok PNP ang mga biktima ang nailhan nga silang Roper Santos, minyo ug Jomar Aman, 19-anyos nga pulos taga Nunez Subd, Polomolok ug Rexter Lasarte, 31-anyos nga taga Malok, Brgy. Labangal ning dakbayan.

Matud ni Sales nahitabo ang pagpamusil sa dihang gisita sa guwardiya sa videokan nga si Karim Muhammad ang usa sa mga biktima nga dili musulod sa VIP room apan nagmagahi.

Miresulta sa mainitong komprontasyon ang pagbadlong sa guardiya nga misangko sa pagpamusil.

Hinuon dili usab grabe ang samad sa tulo ka biktima nga karon nagpaayo sa Pagalungan Hospital.

Gikostudiya na ang suspek sa Polomolok PNP ug gikatakdang pasakaan og kaso.