Pagsakyada kan mga NPA sa mga mining companies, bako soboot huli sa revolutionary tax

NAGA CITY- Nakiaram naman magin an tagapagtaram kan New People's Army (NPA) digdi sa rehiyong Bikol mapapadapit sa alegasyon kan mga militar na revolutionary tax an rason kun tano pinagsakyada an tolong mining firms sa banwaan kan Claver, Surigao del Norte.

Sa nagin entribista kan Bombo Radyo Naga ki Ka Greg Bañares, ipinagpahayag kaini na mayong katotoohan na an rason ninda sa pagsakyada iyu an dae pagtatao nin reboulsyunaryong buwis kan mga kompanya huli ta an mawot sana ninda iyu an mapangatamanan an mga namamanwaan.

Sinda soboot an nagseserbing tingog kan mga ini laban sa administrasyong Aquino na nagtutugot sa mga dayuhang kompanya kan minahan na danyaran an kapalibotan.

Segun digdi, an pagsakyada sa mga ini an saindang paagi tanganing maparalisr an lakdang kan mga kompanya nin minahan sa pagraot kan mga ini sa rekursos naturales na iyu man soboot rason kan dakulang epekto kan kalamidad.

Kung magigirumduman, magin sa rehiyong Bikol an nakapag-rehistro naman nin pagsakyada an mga rebelde sa mga mining companies partikularmente na sa Camarines Norte kun sain an pinakahuri iyu an sa banwaan kan Jose Panganiban.