3 pulis,tangtang sa puwesto tungod sa dunggab sulod sa presintohan

CAGAYAN DE ORO CITY-Gitangtang isip precinct commander sa Bulua Police Station si Police Sr Insp. Celso Montil dinhi sa dakbayan.

Kini nunot sa nahitabong pagkadunggabi patay ni PO3 Marvin Nollano sa mismo nilang detinadong dinakpan diha sa West-Bound police sub station.

Matud ni City Dir. Police Sr/Supt Gerardo Rosales nga maoy mihulip sa dapit ni Capt Montil si Police Sr Insp. Ritchie Yandug.

Dugang ni Col Rosales nga gawas kang Montil gilangkat usab sa ilang puwesto ang deputy station commander ug ang buddy ni Nollano nga si SPO2 Julio Gabot kinsa adtong tungura nagpatrolya hinungdang nakahigayon ang suspek nga si Eduardo Ayento paghimo sa kremin.

Natunulan na usab ug hinabang sa Cagayan de Oro Police City Police Office kon COCPO ang pamilya ni Nollano.

Matud ni Rosales nga subli niyang gipadumduman ang tanang pulis sa syudad nga kanunay mag-alerto aron dili na masubli ang gidangatan.

Samtang angay lamang nga tangtangon sa ilang puwesto ang tulo ka pulis sa Bulua Police Station gumikan sa nahitabong kapalpakan niini sa ilang mga trabaho.

Kini ang reaction ni Kag Ian Mark Nacaya,chairman sa police,fire and public safety sa dihang gitangtang sa puwesto si Montil kuyog ang laing duha ka mga kauban niini.Samtang may ihatag usab silang ayuda alang sa pamilya ni Nollano ning panahona.