Ceasefire, gipadali sa misis; militar nga nagkontrola sa 4 probensya, suportado ang panawagan

BUTUAN CITY - Nagpahayag karon og suporta ang han-ay sa militara sa nahimong panawagan sa misis sa gidagit nga mayor sa Lingig Surigao del Sur nga si Henry Dano nga magpatuman sa temporaryong ceasefire sa upat ka probensya nga gidad-an sa ebeldeng NPA sa mga bihag.

Sa pakighinabi sa Bombo Radyo Butuan kay 4th ID Spokesperson Major Eugene Osias Jr., giklaro sa opisyal, hangtud wala pa silay nadawat nga kamanduan gikan sa ilang National Headquarter nga temporaryong ihunong ang ilang operasyon, dile sila molunga sa ilang misyon.

Apan kun duna silay madawat nga kamanduan gikan sa ilang taas nga opisyal, oras mismo nilang ipatuman ang kamanduan sa maong mga lugar.

Pasabot sa opisyal, kun unsay lakang nga makahatag kaayuhan og paspas nga pagbuhi sa mga gibihag gikan sa kamut sa mga rebelde, ila gilayon kining himuon.

Samtang, suble og kinasingkasing nga nanawagan si Amelia Ventura-Dano sa militar og kapulisan nga ipadali ang pagmando sa suspension of military operation (SOMO) sa pito ka mga lugar nga gipilian sa Southern Mindanao Regional Party Committee-Communist Party of the Philippines nga maoy buhian sa iyang bana nga si Lingig Surigao del Sur Mayor Henry Dano og sa duha ka military body guards.

Ang nahisgutang mga lugar naglangkob sa dakbayan sa Bislig og lungsod sa Lingig sa probensya sa Surigao del Sur, mga lungsod sa Boston og Cateel sa probensya sa Davao Oriental, lungsod sa Trento sa probensya sa Agusan del Sur, mga lungsod sa Monkayo og Compostela sa probensya sa Compostela Valley.

Base sa pahayag nga gipagawas ni Rigoberto F. Sanchez, tigpamaba sa Merardo Arce Command, NPA-Southern Mindanao, kun maseguro na nila nga dunay cessation sa AFP/PNP operation sa nahisgutang mga lugar, dile kini maghimo sa bisan unsang lakang batuk kanila aron dile mosamot kadugay ang pagbuhi sa ilang mga bihag.

"As soon as a release site is determined and the related security matters are cleared, the release shall expeditiously proceed. It is hoped that the AFP/PNP will no longer undertake actions that will cause the unnecessary delay of this procedure." pahayag ni Rigoberto F. Sanchez, tigpamaba sa Merardo Arce Command, NPA-Southern Mindanao.