GENERAL SANTOS CITY- Gisuta na karon sa mga personahe sa Bureau of Fire Protection ang hinungdan sa pagkasunog sa lima ka dakong balay sa Leon Llido St. Lagao ning dakbayan sa Heneral Santos alas 9:00 pasado kagabii.
Matud sa usa ka nanag-iya sa dakong boarding house nga nagsugod ang kalayo sulod sa usa ka lawak ug paspas nga mikatag sa ubang balay nga gihimo usab sa boarding house.
Ang nasunog nga panimalay gipanag-iyahan nilang Leonardo Villa, Warlito Federi, Flaviano Dela Peña, Concordio Yuson, ug Bernabe Gelesania.
Usa sa gitudlong hinungdan sa sunog mao ang nabiyaan matud pa nga kandila human mag-away ang magtiayong boarders.
Wala hinuoy nasamdan o namatay sa maong sunog tungod halos kadaghanan ang wala pa makatulog sa dihang nahitabo ang sunog.
Sobra sa 27 ka pamilya ang nagpuyo sa nasunog nga mga sementadong balay nga gilayun usab gitabangan sa City Social Welfare and Development Office aron adunay matulugan kagabii.
Wala pa makahatag og kantidad sa damyos sa sunog ang Bureau of Fire Protection apan gituuhang moabot sa minilyon ka pesos.
No comments:
Post a Comment