Pagdeploy ug SCAA sulod sa duha ka mining company sa Surigao del Norte, gisugyot sa militar

BUTUAN CITY - Gibisita sa mga opisyal sa 402nd Brigade sa Armed Forces of the Philippines ang duha ka mining companies sa Brgy. Taganito lungsod Claver, Surigao del Norte nga giatake sa mga rebildeng New Peoples Army , aron pormal nga ma-assess ang kasamtangang security situation sa area.

Lakip sa milibot sa area sila 402nd Brigade Commander Col. James V. Jacob ug 30th Infantry Battalion Commander Lt. Col. Vincent Iringan kauban na ang Presidente sa Taganito High Pressure Acid Leaching kon THPAL Corporation nga si Mr. Takamori Fujimura ug ang presidente sa Nickel Asia Corporation kon NAC nga si Gerard Brimo.

Human sa maong pagbisita, gisugyot ni Col. Jacob nga magmontar ug Special CAFGU Active Auxilliary kon SCAA sulod sa maong mga kompanya aron nga mas mapakusgan ug mapahugtan ang seguridad dili lamang sa sulod sa kompanya apan sa kinatibok-ang perimeters.

Apan giklaro ni Col. Jacob nga ang ideploy nga mga SCAA ang ipailawom usab sa military training aron nga mas dunay dakong kahibalo kinsa isyuhan ug high powered firearms nga igo na ngan makahatag ug seguridad sa area batok sa hulga ilabina sa mga rebildeng New Peoples Army.

Samtang gipahayag ni 4th Infantry Division Commander Major General Victor Felix nga gawas sa ideploy nga SCAA nga maoy mag secure sa mga vital installation ,ang Infantry Battalion ang makatutok usab sa combat operation sa ilang area of responsibility.