Lingig, Surigao del Sur Mayor Henry Dano og duha ka military escort, gawasnon na

BUTUAN CITY - Gawasnon na sa hingpit pasado alas-dos karong hapon sila Lingig, Surigao del Sur Henry Dano ka-uban ang iyang duha ka mga military escorts nga sila PFC Alan Saban og Corporal Alrey Desamparado gikan sa ilang mga abductors human ang kapin duha ka buwang pagkabihag.

Sa eksklusibong coverage sa Bombo Radyo Butuan, nabuhiang anaa sa maayong kondisyon ang mga bihag human ang pipila ka higayong paghangyo sa mga membro sa National Democratic Front-Southern Mindanao ang suspensyon sa military og police operations sa mga lalawigan sa Agusan del Sur, Surigao del Sur, Compostela Valley, Davao Oriental og Bukidnon alang sa wala'y bara nga pagbuhi kanila.

Mahinumdumang niadtong Agusto 6 ning tuiga dihang gisulod sa mga rebelde ang pinuy-anan sa mayor aog gidala kini uban ang duha niya ka mga military escorts apil na ang pipila ka mga armas og kagamitan aron atubangon matud pa nila ang reklamong gipasaka sa mga tawo ngadto sa People's Court sa New People's Army batuk kanila.

Human ang pipila ka higayong pagdungog sa kasong ilang gi-atubang sama sa pagbaton og private armies, pagkalambigit sa treasure-hunting activities og dilin maayong serbisyo sa iyang mga constituents alang kang Mayor Henry Dano, misaad kining sundon ang palisiya sa rebolusyunarong kalihukan nga maoy hinungdan nga gihatagan siya og panahong magbag-o.

Ingon niini usab ang tsansang gihatag sa mga rebelde ngadto nila PFC Alan Saban og Corporal Alrey Desamparado nga gikasuhan tungod sa pagpaniid batuk sa rebolusyunaryong kalihukan og pagsalmot sa mga operasyong militar human misaad nga dili na mu-apil pa sa bisan unsa mang military services sa Armed Forces of the Philippines og mubalik na lang sa pagka-sibilyan.

Gipadayag sa tulo nga bisan lisod ang ilang inadlaw-adlaw nga pagpoakabuhi sa kabukiran apan normal usab ang ilang kinabuahi sa bukid nga nagpouyo og natulog lang sa mga tents og duyan tungod kay duna man usab sila'y mga suga og pagkaon ilabina nga kada-buntag, duna sila'y exercises og nakadawat pa og medical attention.

Una nang gikonsidera ni Mayor Dano nga usa ka reflection ang duha ka buwang pagpuyo nila ka-uban ang mga rebelde tungod kay nahinluan matud pa ang ilang kaugalingon gikan sa mga asuntong gipasaka batuk kanila nga naghatag usab og positibong epekto ngadto kanila.