Duha ka gobyerno sa nasud, gi-ila ni Mayor Henry Dano

BUTUAN CITY - Gikonsiderang adlaw'ng natawhan ni Lingig Surigao del Sur Mayor Henry Dano ang kagawasang naangkon gikan sa kamot sa abductors niining New People's Army.

Sa iyang statement atol sa turn-over ceremony kagahapon, emosyunal nga gibalik-lantaw sa mayor ang mga kasinatian samtang anaa sa kamot sa mga rebelde kondiin giila niya nga duna'y duha ka gobyerno nga nagtunhay sa nasud nga mao ang nasudnong gobyerno og rebolusyunaryong gobyerno.

Subay niini, gipasalamatan sa alkalde ang tanang nagpaluyo sa pakignegosasyon alang sa ilang kagawasan partikular na si Surigao del Sur Governor Johnny Pimentel og ubang grupo nga nitabang aron mabuhian sila sa NPA.

Gi-angkon usab sa mayor nga nakalapas siya sa rebolusyunaryong gobyerno og mapasalamatong gidungog sa bagong hukbong bayan og hukumang bayan ang iyang pagpangamuyo.

Gidugang pa sa opisyal nga dili nila malimtan ang pagtratar sa walhong grupo kanila sulod sa kapin duha ka bulan nilang panag-uban tungod kay nahimo siyang halangdon nga ginaserbisyuhan og ginatunulan sa tanan niyang gikinahanglan lakip na niini ang pagkabo sa rebeldeng grupo og tubig nga ginakuha pa usa ka kilometros ang gilay-on aron lang makaligo siya.