Dinagat Island, balik normal na human sa bagyong Ramon

BUTUAN CITY - Balik na sa normal ang kahimtang sa panahon sa Dinagat Island subay sa kompermasyon sa buhatan sa Provincial Disaster Risk Reduction Management Council (PDRRMC).

Gipahayag ni Rosario Roxas, hepe sa PDRRMC Dinagat Island, nipakita na ang kahayag sa haring adlaw human gilibkas ang tanang storm signals sa probensya.

Dugang ni Roxas, namalik na usab sa tagsa-tagsa ka pinuy-anan ang mga pamilyang nanghikling ngadto sa evacuation center tungod sa hulga sa ilang kinabuhi nga hatud sa bagyong Ramon.

Nagsugod na usab ang ilang personahe sa pagpanghatag sa mga relief goods ngadto sa mga apektadong pamilya.

Alayon niini, nibalik na usab sa normal ang bawod sa kadagatan og mahimo na untang maka-biyahe ang tanang sakayang pandagat, apan, sanglit wala pay mandato sa hingtungdang ahensya nga mahimo nang makalawig ang tanang sakayang pandagat, pabilin pang gikansela ang mga biyahe.

Pasabot sa opisyal nga oras duna nay kamanduan gikan sa hingtungdang ahensya nga mahimo nang makalawig ang mga sakayan, ila gilayon kining tugtan nga maka-biyahe.